वन तथा वातावरण मन्त्रालयले शुरु गर्यो ‘एक घर, दुई बिरुवा’ अभियान

१८ जेठ । वन तथा वातावरण मन्त्रालयले विभिन्न प्रजातिका ७०० बिरुवा वितरण गरेर ‘एक घर, दुई बिरुवा’ अभियान शुरु गरेको छ ।

विश्व वातावरण दिवसको पूर्वसन्ध्यामा साताव्यापी कार्यक्रमअन्तर्गत शुक्रबार तेस्रो दिन वन विभागले निजी घरमा वृक्षरोपणका लागि काठमाडौँको बुद्धनगरका स्थानीयवासीलाई सो बिरुवा वितरण गरेको हो । विभागले बुद्धनगर टोलसुधार समितिमार्फत धुपी, तेजपात, अम्बा, काइयोलगायत प्रजातिका बिरुवा वितरण गरेको विभागले जनाएको छ ।

सो अवसरमा विभागका महानिर्देशक कृष्णप्रसाद आचार्यले आममानिसको स्वास्थ्यका लागि हरियाली वातावरण अपरिहार्य रहेको भन्दै यस अभियानमा सबैको साथ र सहयोगको अपेक्षा गर्नुभयो । वन अनुसन्धान तथा सर्वेक्षण विभागका उपमहानिर्देशक यज्ञनाथ दाहालले यस अभियानले हरियाली प्रवर्द्धन भई स्वच्छ वातावरण कायम हुने भएकाले सक्रिय रुपमा लाग्न स्थानीयवासीलाई आग्रह गर्नुभयो ।

टोल सुधार समितिका अध्यक्ष हेमलाल गौतमले वृक्षरोपणका लागि निरन्तर अनुगमन तथा समन्वय गर्ने प्रतिबद्धता व्यक्त गर्नुभयो । मन्त्रालयले यसअघि सरकारले वातावरण दिवसको अवसरमा यही जेठ १६ गते काठमाडौँमा शंखपार्क क्षेत्रमा सरसफाइ कार्यक्रम र जेठ १७ गते मन्त्रालयमा अन्तर्क्रिया कार्यक्रम गरिसकेको छ ।

यस वर्ष “प्लाष्टिक प्रदूषण निर्मूल पारौँ, सके पुनः प्रयोग गरौँ, नसके बहिष्कार गरौँ” भन्ने नाराका साथ जेठ २२ गते विश्वभर वातावरण दिवस मनाइँदै छ । मन्त्रालयले सोही दिन ‘नेपाल स्वच्छ वातावरण महाअभियान, २०७५’ सार्वजनिक गर्दैछ । –रासस

पुरानो समाचार खोज्नुहोस्